Бурнашев Андрей Васильевич

Андрей Васильевич Бурнашев — суруйааччы, Аҕа дойду Улуу сэриитин кыттыылааҕа.

Андрей Васильевич 1912 сыллаахха бэс ыйын 1 күнүгэр Мэҥэ-Хаҥалас оройуонун (уруккута Мэҥэ улууһун) Тараҕай кэһилиэгэр төрөөбүтэ. 14 сааһын туолан баран Бүтэйдээх оскуолатыгар үөрэнэ киирбитэ. Оскуоланы 1933 сылга бүтэрбит, ити сыл комсомол кэккэтигэр киирбит. Тараҕай нэһилиэгин бастакы комсомолецтарыттан биирдэстэрэ. Сырдыкка тардыһар, үөрэҕи ылынымтыа эдэр киһини 1933 с. Баатара оскуолатыгар учууталлата ыыталлар. Онно 1936 с. дылы үлэлиир, онтон 1936 с. 1941 с. дылы Табаҕа 7 кылаастаах оскуолатыгар үлэлиир. 1941-1942 сыллаахха Тараҕай нэһилиэгэр сэлиэнньэ сэбиэтин бэрэссэдээтэлинэн ананан үлэлиир. 1943 сыллаахха ССКП чилиэнигэр хандьыдаатынан киирэр.
1943 сыллаахха бэс ыйыттан 1945 сыллаахха ахсынньыга дылы Забайкальскай уокурук 36 аармыйатын 177 мм полкатыгар рядовой саллаатынан сулууспалаабыта. Кини чааһа Японияны кытта сэриигэ кыттыбыта, Маньчжуриянан Кореяҕа тиийбитэ, Пхеньян куораттан төннүбүтэ. "Германияны кыайыы иһин", "Японияны кыайыы иһин", "1941-1945 сылларга Аҕа дойду Улуу сэриитигэр килбиэннээх үлэһитин иһин" мэтээллэринэн наҕараадаламмыта.
Бурнашев Андрей Васильевич 35 сыл устата начаалынай кылаастар учууталларынан таһаарыылаахтык үлэлээбитэ.

Кинигэ куттаах учуутал төрөппүт оҕолоругар, кэнэҕэски ыччаттарыгар кэриэһин кинигэ суруйан хаалларбыта. Бу "Кыымтан төлөн күөдьүйэр" диэн кинигэни Андрей Васильевич уола АБ үтүөлээх экономиһа, СР НХ үтүөлээх үлэһитэ, АБ Бэдэрээлинэй Мунньаҕын Бэдэрээсийэтин Сэбиэтин чилиэнэ, Ил Түмэн дьокутаата Бурнашев Р.А. 2002 с. бэчээттэтэн таһаарбыта. Кинигэҕэ Саха сирин тыатыгар 20-с үйэ 20-с сылларыгар бастакы пионердар уонна комсомолецтар саҥа олоххо, үөрэххэ тардыһыыларын, сырдык ыраларын, көхтөөх уопсастыбаннайүлэлэрин туһунан кэпсэнэр. Роберт Андреевич аан тылыгар ыччат дьонугар туһаайан маннык суруйар: "Бу кинигэ биһиги аҕа уус тиһигэ быстыбат сибээһэ буоллун уонна үйэлэргэ үтүө үгэс буолан салҕанан бара турдун".