Бампер (тэрилтэ)

Бикипиэдьийэ диэн сиртэн ылыллыбыт
Перейти к навигации Перейти к поиску

“Бампер” оҕо кинигэтин оптуобуһатүмэт урбаанын бырайыагын быһыытынан массыына иһигэр тэриллибит кинигэ маҕаһыына, кулууба. Бырайыак сүрүн сыала – оҕо литэрэтиирэтэ оҕо-аймахха тиийэрин хааччыйыы, киин сиртэн тэйиччи сытар нэһилиэнньэлээх пууннарга оҕо литэрэтиирэтин тириэрдии.

“Бампер” бырайыак Москубаҕа үлэлиир “Перекресток” диэн обургу оҕолорго аналлаах психологическай көмө киинин иһинэн тэриллибит. Ол курдук киин салайааччыта Анна Тихомирова кинигэ маҕаһыынын арынаары гыммыта, харчыта тиийбэккэ, оптуобус ылыммыт уонна оптуобуһун иһигэр кинигэ маҕаһыынын, кулуубун арыйбыт. Киин иитиллээччилэрэ оптуос тас көрүҥүн, иһин оҥорон-тупсаран биэрбиттэр. Оттон тэрили-тээбирини атыылаһарга Михаил Прохоров пуондата көмөлөспүт.

2001 сыллаахха оптуобус “Опора России” тэрилтэни кытары аһымал санаа туурун чэрчитинэн, Краснодар кыраайыгар сылдьан кэлбит. Ол кэннэ сотору буолан баран, бырайыак “Бизнес-Успех” куонкуруска кыттан, “Түмэт-эппиэттээх урбаанньыт” наминацияҕа бастаабыт уонна “Creative Business Cup” диэн айар-тутар дьарыктаах урбаанньыттар куонкурустарын финалиһа буолбут.

2013 сыллаахха бырайыак тэрийээччилэрэ “Baby-НОС” диэн оҕо литэрэтиирэтин куонкуруһугар эспиэр быһыытынан кыттыбыттар.

2014 сыллаахха “бампердар” икки саҥа оптуобуһу эбии атыыласпыттар (эргэлэрэ алдьанан сордуур эбит). Ити сыл “Бампер” бырайыагы Astrid Lindgren Memorial Award-2015 диэн оҕо бириэмийэтигэр “оҕо ааҕыытын көҕүлүүр” диэн салааҕа номинан быһыытынан киллэрбиттэр. “Бампердар” ол куонкуруска Арассыыйаттан кыттыбыт бастыҥ түөрт номинан иһигэр киирбитэ (куонкуруска уопсайа 61 араас дойдуттан 197 номинан кыттыбыт. Олор истэригэр Урсула Ле Гуин, Ульф Старк, Патрик Несс бааллар эбит). Оттон 2014 сыл түмүгүнэн, оптуобус уопсайа Арассыыйа 60 куоратыгар сылдьыбыт, барыта 80 тыһыынча биэрэстэни айаннаабыт.

2015 сыллаахха кинигэ оптуобуһа Lipton хампаанньа тэрийэр Goodstarter түмэт урбаанньыттарын куонкуруһугар бастаабыт. Ол кыайыытын иһин 300 тыһыынча солкуобай харчынан бириэмийэлэммит.

Оҕо кинигэтин оптуобуһа аҥаардас маҕаһыын уонна кулууп эрэ быһыытынан үлэлээбэт. Кинилэр аһымал санаа киинин быһыытынан эмиэ үлэлииллэр. Оттон кинигэ атыытыттан киирбит харчы сороҕо араас социальнай бырагыраамалары олоххо киллэрэргэ уонна, бастатан туран, оҕо ааҕыытын көҕүлээһиҥҥэ туһуланаллар. Итини сэргэ “бампердар” киирбит үбүнэн оҕо дьиэлэригэр кинигэ атыылаһан бэлэхтииллэр.