Ахметова Куляш Дильдаевна
Ахметова Куляш Дильдаевна — Казах норуотун биллиилээх поэтессата, суруналыыс. 2006 сылтан Казахстан республикатын судаарыстыбаннай бириэмийэтин лауреата. Куляш Ахметова Киргизскэй ССР Таласскай уобалаһыгар муус устар 25 күнүгэр 1946 сыллаахха төрөөбүтэ.
Поэтесса Куляш Ахметова 1980 сыллаахха балаҕан ыйыгар Казахскай ССР – га Саха литературатын күннэригэр биһиги суруйааччыларбытын кытта көрсүһүүгэ кыттыбытын туһунан Иван Федосеев «Көрсүһүүлэр уонна санаалар» диэн ыстатыйатыгар ахтыбыта. Алма-Атаҕа икки күннээх истиҥ көрсүһүү кэмигэр эдэр поэтесса саха суруйааччыларын Суорун Омоллоону, Иннокентий Эртюковы, Николай Габышевы, Иван Федосеевы, Алексей Михайловы, Гавриил Колесовы, Иван Егоровы арыаллаан илдьэ сылдьыбыт, Джамбул куораты кытта билиһиннэрбит. Онно туох ханнык иннинэ В.И.Ленин памятнигар, Албан Аат мемориалыгар веноктары уурбуттар, кыраайы үөрэтэр музейга сылдьыбыт.
Иван Федосеев ыстатыйатыттан Джамбул куорат туһунан суруллубуттан:
« Кыраайы үөрэтэр музейга уобалас историята түҥ былыргыттан күн бүгүҥҥэ диэри кэпсэнэр. Бу музей туһунан И.Федосеев ыстатыйатыттан: «Музейга барыта 15 тыһыынча экспонат мунньуллубут. Джамбул куорат маҥнайгы аата – Тараз. Куорат VII үйэҕэ диэри орто үйэтээҕи Караханидтар государстволарын киинэ эбит. Манан эргиэн суола ааһар буолан, куорат олус сайдыбыт. Оннооҕор туойтан уу сүүрдэр турбалары оҥорбуттар. 1220 сыллаахха куораты Чингисхан баламат сэриитэ үнтү урусхаллаабыт, сири кытта тэҥнээбит. Кэлин куорат ол урусхалын аттыгар саҥа куораты туппуттар. Ол куорат 1853 сылтан Аулие – Ата диэн ааттаммыт, 1938 сылтан куорат Джамбул диэн буолбут. »
Ити курдук, саха суруйааччыларын аймахтарбыт казахтар дойдуларын кэрэ, бэлиэ сирдэригэр, түмэллэригэр, Ытык өйдөбүнньүктэригэр барытыгар сырытыннарбыттара үтүө өйдөбүл буолан үйэ-саас өйгө-санааҕа хааллаҕа. «...Оттон Саха сиригэр ыалдьыттыы кэлэр республикалар литератураларын кытта билиһиннэрэр сыалтан тылбаас анал хомуурунньуктара тахсыталаабыттара: Киргизия суруйааччыларын айымньылара “Ала хайа сарыала” диэн ааттанан 1967 сыллаахха, казах суруйааччыларын айымньылара “Умнуллубат көрсүһүүлэр” – 1981 с, «Домбра дорҕоонноро» 1986 с. Ону сэргэ ыалдьыттыы кэлэр республикаларга саха суруйааччыларын айымньыларын улахан хомуурунньуктара тахсыталаабыттара.» - диэн Дмитрий Кириллин “Литературалар доҕордоһуулара, хардарыта байытыһыылара” диэн ыстатыйатыгар суруйан, сырдатан, үйэтитэн турар.
Туһаныллыбыт литература:
[уларыт | биики-тиэкиһи уларытыы]1.И.Федосеев. «Көрсүһүүлэр уонна санаалар». Хотугу сулус. 1980.
2. Дмитрий Кириллин. Литературалар доҕордоһуулара, хардарыта байытыһыылара. Чолбон. 2000, №12