Колесов Афанасий Степанович
Колесов Афанасий Степанович – Аҕа дойду сэриитин кыттыылааҕа
Бэйэ олоҕун кэпсээнэ
Афанасий Степанович 1913 сыллаахха ЯАССР Таатта оройуонун Байаҕантай нэһилиэгин кэрэ айылҕалаах Ичигэс алааһыгар төрөөбүтэ. Ийэтэ Харытыана, аҕата Ыстапаан – колхуостаахтар. Бииргэ төрөөбүт Афанасий, Миитэрэй, Уйбаан, Дьөгүөр диэн уолаттардаах ыал ньир-бааччы олорбуттар. Афанасий Степанович кэргэнэ Аграфена Ивановналыын 11 сыл бииргэ олорон, 9 оҕону төрөппүттэр. Сэрии содулуттан 5 оҕо суорума суолламмыт. Афанасий Степанович, 4 кылаас үөрэхтээх да буоллар, колхуоска бэрэссэдээтэллээбит.
Бойобуой суола
[уларыт | биики-тиэкиһи уларытыы]1943 сыл сайыныгар бииргэ төрөөбүт быраатын кытары Дьөгүөрдүүн тылланан, өстөөҕү өһөрөргө туруналлар. Дьөгүөр үлэ фронугар түбэһэн, сотору доруобуйата айгыраан, дойдутугар эргиллибит. Ол эрээри баара-суоҕа 28 саастааҕар өлбүт. Кини кэргэнэ Марина Романовна эмиэ уһаабатаҕа, 3 оҕо төгүрүк тулаайах хаалан, детдомҥа иитиллибиттэрэ. Оттон Афанасий Степанович салгыы айаннаан, Вологда уонна Калинин куораттарга баар резервэҕэ турар чаастарга 2-лии ый хайыһарга үөрэммит. Кини 284-с стрелковай полк састаабыгар Калининскай, Арҕаа уонна I Украинскай фроннарга сэриилэспит. Сэрии будулҕанын ортотугар сылдьан дьонугар ыыппыт суругар биир дойдулааҕа Алексей Петрович Бравины кытта баалларын биллэрбит. Ону таһынан роталарыгар саха уонча саллаата баар диэн ахтыбыт.
Тохсунньу тостор тымныытыгар Великие Луки куорат таһыгар 284-с стрелковай полк өстөөх күүскэ бөҕөргөтүммүт оборонатыгар кимэн киирбит. Элбэх хаан тохтуулаах кыргыһыы кэнниттэн өстөөх 7 км сири чугуйбут. Ытыалаһыы саамай күүстээх уотун ортотугар сылдьар доҕордуулар иккиэн бааһырбыттар, госпитальтан госпитальга көһө сылдьан эмтэммиттэр. Онтон иккиэннэрин тус-туһунан фроннарга ыыппыттар. Афанасий Колесовы Арҕааҥы фроҥҥа, оттон доҕорун Алексейы Чехословакия хайысхатынан.
1944 сыл сааһыгар хорсун саллаат кэргэнэ Аграфена Ивановнаҕа маннык ис хоһоонноох сурук кэлэр: “Ваш муж, красно армеец Афанасий Степанович Колесов, уроженец Якутской АССР Таттинского района, в бою за социалистическую Родину, верный воинской присяге, проявив геройство и мужество пал смертью храбрых 14 апреля 1944 года. Похоронен на хуторе Шайно Мацильского района Волынской области...”
Оттон кини доҕоро Алексей Бравин сэриини Чехословакия киин куората Прага5а түмүктээбитэ. Дойдутугар кэлэн тыа хаһаайыстыбатыгар таһаарыылаахтык үлэлээбитэ. Сэриигэ ылбыт баастарга аһыллан, 1978 сыллаахха олохтон туораабыта. Кини Афанасий Степанович бойобуой сырыыларыттан дьоҥҥо-сэргэҕэ элбэҕи кэпсиир эбит.