Роберт Кийосаки
Роберт Кийосаки (ааҥл. Robert Toru Kiyosaki, дьоп. ロバート・トール・キヨサキ) — дьоппуон төрдүлээх АХШ-ка олорор миллионер, суруйааччы.
1947 сыллаахха төрөөбүт. Аҕата Гавайи штаат үөрэҕин миниистирэ эбит.
Кинигэлэригэр хайдах баай дьон байалларын, дьадаҥылар тоҕо байбаттарын ырытан кэпсиир. Дьону үлэҕэ сыһыаннарынан 4 бөлөххө араарар: наймылаһан үлэлээччилэр, бэйэлэригэр үлэлээччилэр, элбэх дьону тэрийэн үлэлэтээччилэр уонна инвестордар. Икки бастакы бөлөххө киирэр дьон бэйэлэрин күүстэрин-күдэхтэрин эрэ туһанан харчы өлөрөллөр, онон хамнастара ханнык эрэ сыыппараҕа тиийэн улааппат буолар, кырыйдахтарына, ыарыйдахтарына өссө кыччыыр. Оттон икки бүтэһик бөлөх дьоно атын дьон күүһүн сатаан туһанан, үлэлэрин салайан бэйэлэригэр хамнас оҥостоллор, онон хамнастарын кээмэйэ бүтэр уһуга суох буолар, баҕардахтарына уонна сатабыллаах буоллахтарына үрдүү турар.