Лос-Аламос
Лос-Аламос - АХШ соҕуруулуу-арҕаатыгар Нью-Мексико штаакка баар куорат. Скалистай хайалар быыстарыгар муора таһымыттан 2200 м үрдүккэ турар. Олохтоохторун ахсаана 14 тыһыынча киһи (2008).
Атому чинчийии киинэ, атомнай сэрии сэби оҥорор сир. 1942 сыллаахха Манхэттэн бырайыагын иһинэн Лос-Аламостааҕы национальнай лаборатория олохтоммута. 1943 сыллаахха лаборатория куорат буолбута. Манна бастакы атомнай буомба оҥоһуллубута. Бастакы тургутан эһии 1945 сыллаахха от ыйын 16 күнүгэр ыытыллыбыта. 1943 сылтан 1957 сыллаахха дылы сабыылаах куорат этэ.