Никифоров Гаврил Васильевич

Никифоров Гаврил Васильевич (Манньыаттаах уола) — саха аатырбыт атыыһыттарыттан биирдэстэрэ, Саха сиригэр ырыынак сыһыаннарын олохтооһуҥҥа сүҥкэн оруоллаах киһи.

1871 с. Арҕаа Хаҥалас улууһун I Тыллымы нэһилиэгэр төрөөбүтэ. Дойдутугар киэҥник биллэр Аһыкай аҕатын ууһуттан төрүттээх. Аҕата Василий Сергеевич — Манньыаттаах Баһылай уонна ийэтэ Акулина Адамовна бастакы оҕолоро. Аҕата Түөкэй Сэргэй диэн үс оҕолоох баай киһи удьуора.

I гильдиялаах атыыһыт, бочуоттаах инородец, Император дворун коммерц-советнига. "М.Г. Васильев и Г.В. Никифоров", Г.В. Никифоров и И.П. Антипин" диэн эргиэн дьиэлэри төрүттээбитэ.

Түүлээҕинэн Ирбиит уонна Алын Новгород дьаармаҥкаларыгар эргинэр этэ. Оборота 1 мөл. солк. тахса этэ. Дьокуускай куоракка хас да оскуола туттарбыта, Тыллымыга приход оскуолатын уонна пансион туттарбыта, онно оҕолоро Надежда, Елена уонна Аркадий үлэлээбиттэрэ. Реальнай училище үөрэнээччилэригэр стипендия анаабыта.

Сэбиэскэй былаас буолбутугар баайын -дуолун конфискациялаабыттара. Ол да буоллар атыыһыт түүлээҕин Владивостокка 280 тыһ. солкуобайга атыылаан генерал Пепеляев эспэдииссийэтин фондугар биэрбитэ. Харбииҥҥа олорбута, маҕаһыыннаах уонна түүлээҕи таҥастыыр мастарыскыайдаах этэ.

Япония миграциятын сулууспатын архыыбыгар 1945 с. дойдуттан таҕыста диэн сурук хаалбыта биллэр. Хаһан, ханна өлбүтэ чуолкай биллибэт. Ол сыл уолун Анатолийы СМЕРШ дьоно дьоппуон үспүйүөнэ диэн ааттаан Кытайга туппуттара.