Попов Кирилл Егорович

Бикипиэдьийэ диэн сиртэн ылыллыбыт
Попов Кирилл Егорович

Попов Кирилл Егорович (12.02.1917—1975) — Социалистыы Үлэ Дьоруойа, ойуур хаһаайыстыбатын үлэһитэ, Иккис аан дойду сэриитин кыттыыалаҕа, разведчик, отделение хамандыыра.

Олоҕун олуктара[уларыт | биики-тиэкиһи уларытыы]

1917 сыллаахха тохсунньу (сорох дааннайынан олунньу) 12 күнүгэр Нөөрүктээйи сэлиэнньэтигэр (билигин Лиэнскэй улуус) элбэх оҕолоох кэргэҥҥэ төрөөбүт. Уон иккис оҕо эбит.

1933 сыллаахха Якутлес трест Туруктатааҕы мас кэрдэр учаастагар үлэтин саҕалаабыт. 1937 сыллаахтан мас тиэйээччилэр биригэдьиирдэрэ буолбут.

1941 сыл атырдьах ыйыттан Кыһыл аармыйа. 1941 сыл сэтинньитигэр хомуньуус баартыйа кэккэтигэр киирбит.

Сэтинньигэ диэри Иркутскай уобалас Мальта ыстаансыйатыгар 486-с стрелковай саппаас полкаҕа сулууспалаабыт. Сэтинньиттэн 188-с стрелковай дивизия 523-с полкатыгар разведчик-автоматчиктар роталарыгар. Ахсынньыттан полката Волховскай фроҥҥа. Старай Русса анныгар буолбут кыргыһыыларга бааһыран 4 ыйтан ордук №3458 эвакогоспитальга эмтэммит. Онтон Калинин фронун 31-с пограничнай полкатыгар сулууспалаабыт. Кенигсберг кириэппэһи ылыыга кыттыбыт. Кыһыл Сулус уордьанынан уонна бойобуой мэтээллэринэн наҕараадаламмыт.

1945 алтынньытыттан 1947 сэтинньитигэр диэри 95-с пограничнай этэрээккэ сулууспалаабыт. Старшина сыбаанньалаах демобилизацияланан баран дойдутугар төннүбүт.

Бастаан Турукта онтон Нүүйэ ойуур учаастактарыгар начаалынньыктаабыт. Красноярскайга идэтин үрдэтиммит. Төннөн кэлэн үлэҕэ саҥа ньымалары киллэрбит: ат оннугар тыраахтары күүскэ туһанарга үөрэппит, урукку ыарахан ыйааһыннаах "Баян" диэр эрбии оннугар илдьэ сылдьарга ордук табыгастаах "Дружбалары" ылларбыт. Масчыттарга анаан олорор дьиэ туттарбыт, онон Нүүйэҕэ масчыттар микрорайоннара баар буолбут. Кини көҕүлээһинэн Нүүйэҕэ бибилэтиэкэлээх, ааҕар хостоох култуура дьиэтэ тутуллубут.

1953 сыллаахха Ленскэй райпромкомбинатын дириэктэринэн анаммыт. Онно олордоҕуна "баай төрүттээҕин кистээбит" диэн буруйдаан баартыйаттан усталлар, үлэтиттэн уураталлар.

Онтон Өлүөхүмэҕэ көспүт, онно 4 сыл үлэлээн Жедай лесопуунун инники күөҥҥэ таһаарбыт. Ону көрөн ол саҕана хаалыылаах Дабаан лесопуунугар ыыппыттар. 1960 с. Үөһээ Өлүөнэ леспромхоһугар, онтон Жедай уонна Өлүөхүмэ лесопууннарын салайар.

ССРС Үрдүкү Сүбэтин Президиумун 1971 сыл ыам ыйын 7 күнүнээҕи Ыйааҕынан Попов Кирилл Егоровичка Социалистическай Үлэ Геройун аата иҥэриллибит, Ленин уордьана уонна «Сиэрпэ уонна Балта» кыһыл сулус туттарыллыбыт.

1972 сыллаахтан Өлүөхүмэ леспромхоһун дириэктэрэ.

1975 сыллаахха тохсунньу 27 күнүгэр Дьокуускайга өлбүтэ. Өлүөхүмэ оройуонун Чапаево сэлиэнньэтигэр көмүллүбүтэ.

Наҕараадалара уонна ытык ааттара[уларыт | биики-тиэкиһи уларытыы]

  • Социалистыы Үлэ Дьоруойа[1] (1971)

Эбии маны көр[уларыт | биики-тиэкиһи уларытыы]

Социалистыы Үлэ Дьоруойдарын испииһэгэ (Саха АССР)

Быһаарыылар[уларыт | биики-тиэкиһи уларытыы]

Сигэлэр[уларыт | биики-тиэкиһи уларытыы]

Герои Социалистического Труда Якутской АССР: биобиблиогр. справ. — Якутск, 1987 — С. 120—121.