Чадыр-Лунга манастыыра

Чадыр Лунга манастыыра

Чадыр-Лунгаатааҕы Димитриевскай манастыыр - Нуучча православнай сыаркабын, Гагаузия Чадыр-Лунга куоратыгар баар, Кагульской уонна Комратской епархияларга киирэр дьахтар манастыыра. 1972 с. Сэбиэскэй былаас, куорат ортотугар турар Святой Димитрий хараамын дэлби тэптэрбиттэрэ. 14 саастаах Дмитрий Кириогло, урусхал анныттан икки бүтүн ордон хаалбыт иконалары таһаарбыта. 80-ус сыллар бүтүүлэригэр, Дмитрий Кириогло, Москубаҕа духовнай семинарияны бүтэрэн, Чадыр-Лунгаҕа төннөн кэлбитэ. 1988 с. ССРС Үрдүкү Сэбиэтин Президиумыгар, хараамы тутарга көрдөһүү суругу өйүүргэ сүүһүнэн илии баттааһынын хомуйбута. Хараамы тутары көҥүллээбиттэрэ эрээри, сири урукку курдук куорат ортотугар буолбакка, куорат кытыытыгар, кылабыыһа аттыгар биэрбиттэрэ. Саҥаттан тутуллубут хараам истиэнэлэрин, Дмитрий бэйэтин кыыһын Ксенияны кытта уруһуйдаабыттара. Ону кытта, Дмитрий, 18 үйэтээҕи балканскай истииллээх кыһан оҥоруу иконостас эскиһин уруһуйдаабыта. Иконостаһы Украина маастардара оҥорбуттара. 2000 с. алтынньы 7 күнүгэр, Нуучча православнай сыаркабын Священнай синода Свято-Димитриевскай приходу дьахтар манастыыра гынарга уураахтаабыта. 2009 с. от ыйын 27 күнүттэн, манастыыр настоятельницатынан монахиня Елисавета(Попова) анаммыта. 2014 с. манастыыр тутууларын аннынааҕы сир сыҕарыйан барбыта. Сири бөҕөргөтөргө манастыыр 400000 кэриҥэ лейи ороскуоттаабыта эрээри, баара-суоҕа 3 сылынан, бетон тирээбиллэр сууллан түспүттэригэр, манастыыр тутуулара сууллар куттала үөскээбитэ. 2017 с.манастыыр тулатынааҕы хаспаҕы эмиэ бөҕөргөппүттэрэ. Бу сырыыга Гагаузия салайааччылара өйөөбүттэрэ. 2019 с. туругунан, манастыырга 20 послушница баар. Манастыыр хараама икки бөрөстүөллээх: Святой великомученик Димитрий Солунскай аатыгар уонна святитель Николай Чудотворец аатыгар. Хараам аттыгар духовно-просветительскай киин, куолакаллардаах звонница, кельялар уонна хаһаайыстыбаннай корпус бааллар. Ону кытта, манастыыр бас билэр, биэс гектар иэннээх, үүнээйи олордор хонуулара, виноградниктара сыталлар. Манастыырга, урукку Свято-Димитриевскай хараамтан ордубут икки икона уонна холуодьастан булуллубут Божья Матерь Гербовецкай икона былыргы куоппуйата хараллан тураллар. https://ru.m.wikipedia.org/wiki/%D0%A7%D0%B0%D0%B4%D1%8B%D1%80-%D0%9B%D1%83%D0%BD%D0%B3%D1%81%D0%BA%D0%B8%D0%B9_%D0%94%D0%B8%D0%BC%D0%B8%D1%82%D1%80%D0%B8%D0%B5%D0%B2%D1%81%D0%BA%D0%B8%D0%B9_%D0%BC%D0%BE%D0%BD%D0%B0%D1%81%D1%82%D1%8B%D1%80%D1%8C https://gagauzinfo.md/index.php?newsid=29323