Роналдо

Роналдо
Төрөөбүтэ	1976 балаҕан ыйын 18 Итагуаи, Бразилия
Позицията	бастааччы
Уҥуоҕа	183

Роналдо (Ronaldo), толору аата Рона́лду Луи́с Наза́риу ди Ли́ма (Ronaldo Luís Nazário de Lima), диэн Бразилия футбол оонньооччута, бастааччы. Бары кэмнэрдээҕи биир бастыҥ футболист буолар. Хонуу араас позицияларыттан атаакалыыр бастааччы быһыытынан кини оонньуур истиилэ эдэр көлүөнэ футболистарыгар улахан сабыдыаллааҕа. Үс төгүллээх ФИФА Сыл оонньооччута уонна икки төгүллээх Алтан мээчик бириэмийэлэрин лауреата.

Роналдо профессиональнай карьерата 1993 сыллаахха Бразилия Крузейро кулуубугар саҕаламмыта. 1994-1996 сылларга Нидерланд ПСВ кулуубугар оонньообута. 1996 сылга Барселона Роналдону ол кэмҥэ рекорднай 19,5 млн долларга атыыласпыта. Бу кулуупка оонньуу сылдьан 20 сааһыгар ФИФА Сыл оонньооччутунан ааттанан бу бириэмийэ саамай эдэр кыайыылааҕа буолбута. 1997 сыллааҕы сайыҥҥы трансферыгар Интер Роналдону 27 млн долларга ылан саҥа рекорднай контракт түһэрсибитэ. 1997 сыллаахха Алтан мээчик бириэмийэ саамай эдэр кыайыылааҕа буолбута. Роналдо 23 сааһыгар бары турнирдарга 200 тахса гол киллэрбитэ. Онуоха, хаста да тобугун күүскэ өлөрөн үс сыл кэриэтэ тохтообута. 2002 сыллаахха Реал Мадридка көһөн тиийэн Испания 2002-03 сезоннааҕы чемпиона буолбута. Кэлин Милан уонна Коринтианс кулууптарыгар оонньообута. 2011 сылга эчэйиитэ элбээн карьератын түмүктээбитэ.

Роналдо Бразилия хомуур хамаандатын иһин 98 маатчы оонньоон 62 голлаабыта. Голун ахсаанынан Бразилия хамаандатын үһүс бомбардира буолар. 17 саастааҕар 1994 сыллааҕы аан дойду чемпионатын кыайбыта. 1998 сыллааҕы аан дойду чемпионатын финалиһа уонна бастыҥ оонньооччута буолар. 2002 сыллаахха иккистээн чемпионнаабыта. Финаалга иккитэ голлаан турнир бастыҥ бомбардира буолан Алтан буутса бириэмийэтин ылбыта. Бу турнир түмүгүнэн 2002 сыллааҕы ФИФА Сыл оонньооччута уонна иккис Алтан мээчик бириэмийэлэрин ылбыта.

Тус олоҕо

Роналдо үс дьахтартан түөрт оҕолоох икки уол икки кыыс. Футболлаан бүтэн баран футбол агенынан уонна спорт комментаторынан үлэлээбитэ. 2011 сылтан Бразилияҕа буолуохтаах 2014 сыллааҕы аан дойду чемпионатын оргкомитетын баһылыга этэ.

Роналдо 2018 сыллаахха Испания Реал Вальядолид кулуубун акцияларын 51% 30 млн эуроҕа ылан кулууп тойоно буолбута. 2021 сыл ахсынньы 18 күнүгэр Крузейро кулуубун акцияларын 90% 70 млн долларга ылан кулууп иэстэрин төлөөн Крузейроны Бразилия чемпионатын бастакы дивизионугар төннөрбүтэ. 2024 сыл муус устарыгар кулууп акцияларын хонтуруоллуур пакетын атыылаабыта.

Карьерата

Ыччат кулууптара

• Валкейре (футзал): 1986—1989
• Сосиал Рамос: 1989—1990
• Сан Кристован: 1990—1993

Профессионал кулууптар

• Крузейро: 1993—1994
• ПСВ: 1994—1996
• Барселона: 1996—1997
• Интер: 1997—2002
• Реал Мадрид: 2002—2007
• Милан: 2007—2008
• Коринтианс: 2008—2011

Ил хамаанда

• Бразилия U17: 1993—1994
• Бразилия: 1994—2011

Ситиһиилэрэ

Хамаанда ситиһиилэрэ

ПСВ

• Нидерланд куубага: 1995/96

«Барселона»

• УЕФА куубактаахтар куубага: 1996/97
• Испания куубага: 1996/97
• Испания суперкуубага: 1996

«Интернационале»

• УЕФА куубага: 1997/98

«Реал Мадрид»

• Испания чемпиона: 2002/03
• Испания суперкуубага: 2003
• УЕФА суперкуубага: 2002
• Континеннардааҕы куубак: 2002

«Милан»

• УЕФА суперкуубага: 2007

«Коринтианс»

• Сан Паулу штатын чемпиона: 2009
• Бразилия куубага: 2009

Бразилия хамаандата

• Аан дойду чемпиона (2): 1994, 2002
• Америка куубага (2): 1997, 1999
• Аан дойду вице-чемпиона: 1998
• Олимпия оонньууларын бронзата: 1996

Тус ситиһиилэрэ

• Алтан мээчик (France Football) (2): 1997, 2002
• ФИФА Сыл футболиһа (3): 1996, 1997, 2002
• Алтан буутса: 1997
• УЕФА версиятынан бастыҥ сыаналаах оонньооччу: 1998
• Америка куубагын бастыҥ бомбардира: 1999
• Испания чемпионатын бастыҥ бомбардира (2): 1996/97, 2003/04
• Нидерланд чемпионатын бастыҥ бомбардира: 1994/95
• Минейро лигатын бастыҥ бомбардира: 1994
• Либертадорес суперкуубагын бастыҥ бомбардира: 1994