Михайлов Николай Евтроньевич

Бикипиэдьийэ диэн сиртэн ылыллыбыт
Перейти к навигации Перейти к поиску

Михайлов Николай Евтронтьевич - I Бордоҥ нэһилиэгэр төрүттээҕэ, аатырбыт сылгыһыт.

1933 сыллаахха Ньурба оройуонун I Бордоҥ нэһилиэгэр холкуостаахтар кэргэннэригэр төрөөбүтэ. Аҕата эрдэ өлөн Маалыкай начальнай оскуолатын үһүс кылааһын бүтэрээт «Асхар» холкуоска сүөһү көрүүтүгэр үлэлээн барбыта.

Кэлин 1951 сылтан 1972 сылга диэри Степан Васильев аатынан «Передовой отряд» холкуоска, онтон сопхуоска сүүрбэттэн тахса сыл устатыгар сылгыһытынан, салгыы ынах ферматыгар бостуугунан үлэлээн 1997 сыллаахха пенсияҕа тахсыбыта. Ордук тахсыылаахтык Николай Евтроньевич Степан Васильев аатынан сопхуоска, кэлин сылгы собуота буолбутун кэннэ үлэлээбитэ. Хаһаайыстыба биир тутаах үлэһитэ буолан бронь оҥоһуллан армияҕа ыҥырыллыбатаҕа.

Кини Степан Васильев совхоз, онтон сылгы собуотун аатырбыт сылгыһыттар А.Тыасытов, С.Афанасьев, А.Егоров, С.Петров звеноларыгар үлэлэспитэ. Сылгыны көрүүгэ-истиигэ сылын аайы үрдүк көрдөрүүлэри ситиһэрэ. Ол курдук VIII-IX пятилетка сылларыгар киниэһэ сыһыарыллыбыт сылгылыраны 100% тыыннаахтыы иитэн, кулун деловой тахсыытын 90-95%-ҥа тиэрдибитэ. Маны кини сылгыны табатык мэччитэн, сөптөөх аһылыгынан хааччыйан, көрө сылдьан сылгы ырыгыннаары гыннаҕына эбии аһатан, биэ төрүүрүгэр анал далларга хаайан, дьуһуурустуба олохтоон саҥа төрүөҕү энчирэппэккэ үрдүк көрдөрүүнү ситиһэрэ. Ити барыта звено, биригээдэ былаанын, эбэһээтэлистибэтин аһара толорор кыаҕын үөскэтэрэ.

Н.Е.Михайлов коммунистическай үлэ ударнига, сүөһү иитиитигэр иккис кылаастаах маастар буолбута, 1968 сыллаахха ССРС норуотун хаһаайыстыбатын ситиһиилэрин быыстапкатын кыттыылааҕа буолбута.

Степан Васильев аатынан совхоз, онтон конезавод сылгыта Мэгэдьэк боруода сылгыта буолуутугар сыралаах үлэтэ үрдүктүк сыаналаммыта: «Аҕа дойду улуу сэриитин 1941-1945 сылларыгар килбиэннээх үлэтин иһин», «Үлэ ветерана» мэтээллэринэн, ССРС НХСБ (ДДНХ) боруонса мэтээлинэн, САССР Үрдүкү Сэбиэтин Президиумун Бочуотунай грамотатынан, Саха АССР тыатын хаһаайыстыбатын I степеннээх дипломунан наҕараадаламмыта. Сылгыны иитиигэ үтүөлэрин учуоттаан Саха АССР Үрдүкү Сэбиэтин Президиумун 1964 сыл муус устар 24 күнүнээҕи Ыйааҕынан Н.Е.Михайловка «Саха АССР үтүөлээх сылгыһыта» бочуоттаах аат иҥэриллибитэ.

Н.Е.Михайлов 2002 сыл тохсунньу 17 күнүгэр 69 сааһыгар сылдьан өлбүтэ.