Лыткина Екатерина Агафадоновна

Лыткина Екатерина Агафадоновна — оһуохай этээччи, Аан Дархан этээччи (2007), үлэ бэтэрээнэ, СӨ култууратын туйгуна.

1952 сыллаахха кулун тутар 5 күнүгэр Сунтаар улууһугар төрөөбүтэ. Ийэтэ Мария Ивановна Васильева олоҕун тухары холкуоска ыанньыксыттаабыта, тарбыйах көрбүтэ, килбиэннээх үлэтин иһин ВДНХ-ҕа кыттыбыта. Аҕата Агафадон Титович Лыткин (Олоҥхолоох Оппудуон) биллэр тойуксут, оһуохай этээччи этэ. Эһэтэ Тит Андреевич Лыткин (Ырыа Тиитэп) олоҥхоһут, тойуксут, оһуохай этээччи быһыытынан биллэрэ.

1969 с. Бүлүүчээн оскуолатын бүтэрбит. Икки сыл ыанньыксыттаан баран Дьокуускайдааҕы үп техникумугар киирбит. 1972 с. эдьиийгэр Розалия Ивановна Васильеваҕа Эдьигээҥҥэ көспүт, онно атыыһыттаабыт. Кэргэн тахсыбыт.

1979 с. Сунтаар Кириэстээҕэр көспүт. Онно атыыһыт, биэкэр, ыскылаат сэбиэдиссэйинэн үлэлээбит.

1996 с. Дьокуускай Хаҥаҕалаһыгар көспүт, биэнсийэҕэ олорон Кытайтан табаар таһан атыылыыр эбит.

2006 сыллаахха Сунтаар ыһыаҕар Дархан этээччи буолбут. 2007 сыллаахха Туймаада ыһыаҕар бастаан "Аан Дархан этээччи" сыбаанньатын ылбыта, "Жигули" массыынаны туттарбыттара.

2013 сыллаахха бэс ыйын 12 күнүгэр кыра кыыһыгар Дьокуускай Мархатыгар олорон ыалдьан өлбүтэ.

Аатын үйэтитии

• Дьокуускайга куорат дууматын 2019 сыл муус устар 17 күнүнээҕи быһаарыытынан Мархаҕа кини аатынан куоллаҕас (переулок) ааттаммыт (2005).