Кухто Петр Аполлонович

Кухто Петр Аполлонович, Батько Кухто (19.03.1914-17.11.1975) — Саха сирин аатырбыт авиатора, Маҕаннааҕы холбоһуктаах авиа этэрээт (объединенный авиаотряд) тэрийээччитэ, Маҕан авиаэскадрильятын олоҕор Ньурба, Эдьигээн, Баатаҕай, Зырянка, Өлүөхүмэ авиа этэрээттэрэ тэриллибиттэрэ.

1914 с. Беларусь Гомель уобалаһыгар төрөөбүтэ. 1936-38 сс. стрелок-радиһынан аармыйаҕа сулууспалаабыта. 1938 с. Дьокуускайга транспортнай этэрээккэ бортрадиһынан үлэлии киирбит. 1942 сыллаахтан АлСибка флагманскай радиһынан көтөр буолбут. 1945 сылтан пилот буолбут. 1946 сылтан 234-с аналлаах авиа этэрээт (ОСП, отряд спецприменения) пилота буолбут, санитарнай звено хамандыыра.

1950 с. 140-с авиа этэрээт хамандыырынан анаммыт. 1957 сыллаахха от ыйыгар авиа этэрээт Маҕаҥҥа көһөрүллүбүт. Ол саҕана Маҕаҥҥа икки холомо (землянка), тутулла турар кырачаан мас вокзаал уонна сөмүлүөт түһэр ыраас хонуута эрэ бааллара. Аҕыйах сылынан бөһүөлэккэ үлэлиир уонна икки этээстээх олорор дьиэлэр, кулууп уонна дьыссаат тутуллубуттара. Этэрээт 11 оройуоҥҥа көтөр этэ, геологоразведканы хааччыйара.

Наҕараадалара

• "Үлэ Кыһыл Знамята" уордьан (1943)
• "Аҕа дойду 1941-1945 сс. сэриитигэр Германияны кыайыы иһин" мэтээл
• "Отличник Аэрофлота" бэлиэ
• Саха АССР көлөтүн үтүөлээх үлэһитэ.

Кухто туһунан

• Рассказы о Кухто / В.А. Нерчу. - Якутск : Кн. изд-во, 1990 (1991). - 156 с.
• Авиаторы Якутии в годы войны. // Эхо столицы. - 2019. - 13 декабря. С. 8-9.

Аатын үйэтитии

• 2014 с. кулун тутар 21 к. Маҕан аэровокзалын эркинигэр өйдөбүнньүк хаптаһын ыйаммыта.
• 2014 с. от ыйын 10 к. Арассыыйаҕа бастакы көтөр госпитальга - "Полярнай авиалиниялар" Л-410 сөмүлүөттэригэр - кини аата иҥэриллибитэ.
• Маҕан бөһүөлэгин киин уулуссата кини аатын сүгэр.