Кочнев Пантелеймон Иннокентьевич

Кочнев Пантелеймон Иннокентьевич (23.08.1898-25.04.1973) — мэтэдиис учуутал, РСФСР норуот үөрэҕириитин туйгуна, Саха АССР оскуолатын үтүөлээх учуутала. Тулагы-Киллэм нэһилиэгин Ытык киһитэ.

1898 с. атырдьах ыйын 23 күнүгэр Куочайга атыыһыт кэргэнигэр төрөөбүтэ. Аҕата уол биэстээҕэр өлбүтэ, онон үс эдьиийин кытта эһэтигэр Михаил Трофимович Кочневка иитиллибитэ. Бастаан сыылынайдарга ааҕарга-суруйарга үөрэммит, онтон Ньурба оскуолатыгар киирбит. 1913 сыллаахха Бүлүү начаалынай училищетын бүтэрбит уонна 15 сааһыгар Марха начаалынай училищетыгар учууталынан анаммыт.

1914 сыл күһүнүгэр Дьокуускайга учуутал сэминээрийэтигэр үөрэнэ киирбит. 1917 сыл сааһыгар Ойуунускайдыын, Аммосовтыын, Аржаковтуун, Мегежекскэйдиин, Степан Васильевтыын бүтэрбит.

Саха сирин оскуолаларыгар биир бастакынан кыраайы үөрэтии хайысхатын киллэрбитэ. Юннат уонна уус-уран, муусука куруһуоктарын тэрийбитэ.

1973 с. муус устар 25 күнүгэр өлбүтэ.

Айымньылара

• Сырдык мөссүөннэр (оскуола оҕолоругар) / - Якутскай : Кинигэ издательствота, 1972. - 39 с.

Уолаттара

• Улахан уола Михаил — Нерюнгри куорат бастакы баһылыга.
• Валерий — педагогика билимин дуоктара, Хотугу Форум акадьыамыга
• Николай — Тулагы оскуолатын дириэктэрэ буола сылдьыбыта
• Кыра уола Пантелеймон — авиатор.

Наҕараадалара

• 1967 с. сэтинньи 5 к. Тулагы-Киллэм нэһилиэгин Ытык киһитэ диэн аат иҥэриллибитэ.
• Ленин уордьана

Аатын үйэтитии

• Кини аатынан 2015 сыллаахха ахсынньы 18 к. Дьокуускайга Тулагы-Киллэм уулуссата ааттаммыта.
• Тулагы орто оскуолата 1994 сылтан кини аатын сүгэр.