Костюшко-Валюжанич Антон Антонович

Костюшко-Валюжанич Антон Антоновичт(1876-15.03.1906) — 1904 сыллааҕы Дьокуускайга буолбут сыылынайдар сэбилэниилээх утарсыыларын ("Романовка") салайааччыларыттан биирдэстэрэ. Читааҕа 1905 сыллааҕы сэбилэниилээх өрө туруу тэрийээччилэриттэн биирдэстэрэ.

Екатеринослав куоракка полковник дьиэ кэргэнигэр төрөөбүтэ. Кадеттар училищеларыгар Псковка үөрэммитэ, Павловскай байыаннай училищены бүтэрбитэ, Екатеринославтааҕы үрдүкү хайа училищетын бүтэрбитэ.

1900 с. РСДРП чилиэнэ.

1901 сыллаахха ахсынньы 15 күнүгэр Екатеринославка демонстрацияҕа кыттыбыт, онно тыл эппит. Хаайыллыбыт. 1903 с. суутунан 5 сылга ууруллан Саха уобалаһыгар утаарыллыбыт.

Дьокуускайга сотору кэминэн кэргэнэ буолбут Татьяна Жмуркиналыын 1903 сыл от ыйыгар аҕалыллыбыттара. Костюшконы Нам улууһугар олохсуппуттара. Ол эрээри күһүн бэйэтэ Улахан Марха сэлиэнньэтигэр көспүт, мас ууһун быһыытынан дьарыктаммыт, оҕолору үөрэппит.

1904 сыллаахха Курнатовскайдыын сыылынайдар өрө турууларын тэрийбит. Атырдьах ыйыгар 12 сылга хаатыргаҕа анаммыт уонна Иркутскайга ыытыллыбыт. 1905 сыллаахха Арассыыйаҕа дьалхааннар саҕаламмыт кэмнэригэр атырдьах ыйын 31 күнүгэр хаайыыттан күрээбит уонна Чита куоракка алтынньыга тиийэн РСДРП Читаатааҕы кэмитиэтин чилиэнэ буолбут. Оробуочайдартан турар дружиналары тэрийбит, эрчийбит. Хам баттааһын кэнниттэн тутуллубут.

1906 сыллаахха кулун тутар 15 күнүгэр суут уурааҕынан Чита аттыгар Титов мыраанын анныгар ытыллыбыт.

Аатын үйэтитии

• Дьокуускайга Марха сэлиэнньэтигэр кини аата уулуссаҕа иҥэриллибитэ.
• Читааҕа, ытыллыбыт сиригэр Титовскай мыраан анныгар, 1926 с. мэҥэ туруорбуттара.
• Читааҕа кини аатын уулусса сүгэр, өйдөбүнньүк хаптаһын ыйаммыт.