Кларов Прокопий Николаевич
Кларов Прокопий Николаевич (14.10.1907 – 05.01.1962) – «III пятилетка» холкуос стахановеһа. Сунтаар оройуонун Бочуоттаах гражданина, «Килбиэннээх үлэтин иһин», БСТХВ мэтээллэрдээх тыыл бэтэрээнэ.[1]
Кларов Прокопий Николаевич 1942с тууһу Кэмпэндээйиттэн Сунтаарга, өрүс бириистэнигэр таһыыга хотуулаахтык үлэлээбит. Улахан судаарыстыбаннай суолталаах туус, өрөспүүбүлүкэ үрдүнэн тэриллибит сүүһүнэн ааҕыллар балыктыыр биригээдэлэр бултаабыт балыктарын тууһуурга олус наадалааҕа. Ахсынньы 17-с күнүгэр 1942с. маннык суруйуу бэчээттэммит: «Тууһу Кэппэндээйиттэн бириистэҥҥэ таһыыга 8 нэһилиэктэн 11 холкуостар эрэ үлэлээн эрэллэр. 500 ат оннугар 95 ат үлэлиир. «3-с пятилетка» холкуос бэрэссэдээтэлин солбуйааччы таб. Ларионов Петр Иванович уһулуччу учугэй тэрээһини оҥордо. Кини бэйэтин холкуоһуттан 12 аты биэрдэ уонна активнай, чиэһинэй холкуостааҕы биэрбитэ. Кларов Прокопий Николаевич биригэдьиирдээх биригээдэ былаанын 135% толордо». Ол курдук Прокопий Николаевич 1933 сыллаахтан, «3-с пятилетка», холкуос тэриллиэҕиттэн 1961сылга, олохтон туоруор диэри, бэйэтин харыстаммакка үлэлээн, атыттарга холобур буолара. Холкуос арыытын, этин, үүтүн хас да атынан тиэйэн, тайҕаҕа (Бодойбоҕо) илдьэн, Павлов Яков Титовичтыын, Николаев Макар Титовичтыын, Иванов Роман Прокопьевичтыын атыылаан кэлэрэ.
От охсуутугар, мас кэрдиитигэр, буор хаһыытыгар мээнэ киһи тэҥнэспэт кыайыгас үлэһит кини буолара. Оройуон передовик үлэһитэ сэрии сылларыгар «Килбиэннээх үлэтин иһин» мэтээлинэн, биир бастакынан БСТХВ-н мэтээлинэн, 1950 сыллаахха БСТХВ-р кыттар путевканан наҕараадаламмыта. Киниэхэ Сунтаар оройуонун бочуоттаах олохтооҕун аата иҥэриллибитэ. Кэргэнэ Евдокия Николаевналыын 7 кыыс, 3 уол оҕону төрөтөн, көрөн-харайан улаатыннартаабыттара. Билигин 10 оҕолоруттан 39 сиэн, 20 –тэн тахса хос сиэн уонна хос-хос сиэннэр улааталлар, сайдаллар[2].