Иннокентьева Нюргуяна Николаевна

Иннокентьева Нюргуяна Николаевна – худуоһунньук, Кыргыз Өрөспүүбүлүкэтин култууратын туйгуна.

1974 с. тохсунньу 20 күнүгэр Дьокуускай куоракка норуодунай худуоһунньук Иннокентьев Николай Николаевич дьиэ кэргэнигэр төрөөбүтэ.

Дьокуускай № 2 орто оскуолатыгар үөрэммит. 8 кылаас кэнниттэн художественнай училищеҕа киирэр. 1993 с. Москваҕа В.И. Суриков аатынан Государственнай академическай художественнай институтка үөрэнэ киирэр, 2002 с. В.М. Сидоров мастерскойун кыһыл дипломунан бүтэрэр.

Институтун кэннэ Бишкеккэ (Кыргызстан) кэргэнин дойдутугар көһөр. Кэргэнэ Аскар Турумбеков – Кыргыз Өрөспүүбүлүкэтин биллиилээх скульптора, культура туйгуна, наука уонна техника уобластарыгар государственнай премия лауреата. Кэргэнниилэр үс кыыс оҕолоохтор.

Нюргуяна Николаевна 2003 сылтан бэттэх Кыргыз Өрөспүүбүлүкэтин худуоһунньуктарын Союһун чилиэнэ. Аан Дойду уонна өрөспүүбүлүкэ үрдунэн ыытыллар быыстапкаларга көхөөхтүк кыттар. Кини үлэлэрэ Кыргызстан судаарыстыбаннай музейдарыгар уонна дьон чааһынай коллекцияларыгар тураллар.

2005 сылтан ыла С.А. Чуйков аатынан художественнай училищеҕа живопись уонна композиция предметтэрин биэрэр. Бу үөрэх тэрилтэтин иһинэн өр сылларга живопись уонна композиция хамыыһыйатын бэрэсэдээтэлинэн үлэлээбитэ.

2013 с. Кыргызстаҥҥа олорор сахалар «Олоҥхо» диэн уопсастыбаннай тэрилтэни арыйаллар, диаспора бастакы бэрэсэдээтэлинэн ананар.

Быыстапкалара:

1995 с. – өрөспүүбүлүкэтээҥҥи сааскы быыстапка, КГМИИ, Бишкек;

1999 с. – ЦДРИ устудьуоннарын быыстапкалара, Москва;

2002 с. – «Весенний салон» Арассыыйа куонкурустарыгар бастаабыт худуоһунньук дьахталлар быыстапкалара, Москва;

2003 с. –Аан дойдутааҕы художественнай салон «ЦДХ-2003», Москва;

2004 с. – «Жети сезим», Бишкек;

2005 с. – персональнай быыстапка, Бишкек;

2006 с. – персональнай быыстапка, Бишкек;

2007 с. – «Молодые художники России», Москва;

2007 с. – «Кошой-Коргон» пленэр түмүгүнэн быыстапка, Бишкек;

2007 с. – «Молодость» (СНГ форумун чэрчитинэн), Алма-Ата;

2009 с. – персональнай быыстапка, Бишкек;

2010 с. – Кыргызстан худуоһунньук дьахталларын ассоциациятын быыстапката, Бишкек;

2016 с. – Анталияҕа (Турция) быыстапка;

2018 с. – Чингиз Айтматов 90 сылыгар аналлаах быыстапка, Бишкек;

2019 с. – «Многогранная цивилизация – единый путь» ШОС саммитын чэрчитинэн быытапка, Бишкек;

2020 с. – «Новый Соцреализм», Бишкек;

2021 с. – «Ковид-19», Бишкек;

2021 с. – ООН көмөтүнэн Баткеҥҥа буолбут сыдьааҥҥа аналлаах быыстапка, Бишкек;

2021 с. – «Новый Соцреализм-2», Бишкек;

2022 с. – «Новый Соцреализм-3», Бишкек;

2023 с. – ТЮРКСОЙ тэриллибитэ 30 сылыгар аналлаах быыстапка, Бишкек;

2024 с. – ТЮРКСОЙ: «Женская вселенная тюркского мира», Бишкек;

2025 с. –Аан Дойдутааҕы симпозиум отчуоттуур быыстапката, Баку (Азербайджан).

Публикациялар:

ЭлТР «Маданият» — интервью;
«Азаттык» YouTube-канал — «революция портреттарын» суруйбут худуоһунньук;
Open.kg портал — биография;
«Саха Парламент» хаһыат — ыстатыйа;
Aartuk.ru: "Боль Киргизского народа в полотнах якутской художницы".