Ини-бии Нифонтовтар ааттарынан куоллаҕас

Ини-бии Нифонтовтар ааттарынан куоллаҕас (переулок) — Дьокуускай куорат уокуругун Киллэм сэлиэнньэтигэр баар куоллаҕас. Куорат дууматын 2015 сыл балаҕан ыйын 9 күнүнээҕи быһаарыытынан Капитоновкаттан төрүттээх Иккси аан дойду сэриитигэр өлбүт үс ини-бии: Василий, Михаил уонна Агей Нифонтовтар ааттарынан ааттаммыт.

Ини-бии Нифортовтары - Дмитрий, Яков, Прокопий, Михаил, Василий, Агей - Капитоновка сэлиэнньэтигэр төрөөбүттэр. Ийэлэрэ эрдэ өлөн уолаттарын аҕалара Павел Прокопьевич Нифонтов атаҕар туруортаабыт.

Василий Павлович 1912 сыллаахха төрөөбүт, 1941 сыллаахха аармыйаҕа ыҥырыллыбыт, младшай сержант сыбаанньатын ылбыт. 1943 сыллаахха атырдьах ыйыгар өлбүт, ханна көмүллүбүтэ биллибэт.

Михаил Павлович 1913 сыллаахха төрөөбүт, 1941 сыллаахха балаҕан ыйыгар аармыйаҕа ыҥырыллыбыт. 1942 сыллаахха кулун тутар 24 күнүгэр Новгород уобалаһыгар Чудовскай оруйуоҥҥа Любинское поле диэн сиргэ көмүллүбүт.

Агей Павлович 1920 с. төрөөбүт. 1941 с. аармыйаҕа ыҥырыллыбыт. Рядовой этэ, 14-с механизированнай биригээдэҕэ сулууспалаабыт. 1943 сыллаахха от ыйын 21 күнүгэр Украинаҕа өлбүт, Ворошиловградскай уобалас Мариховка сэлиэнньэтигэр көмүллүбүт.

Павел Прокопьевич өссө икки уолун Дмитрийи дьиэ кэргэнин кытта уонна Яковы 1938 сыллаахха Булуҥ оруйуонугар Быков тумулугар көһөрүүгэ ыыппыттар, балык собуотугар үлэлээбиттэр. 1939 сыллаахха иккиэн сыынгалаан өлбүттэр. Оҕолоро эһэлэригэр Капитоновкаҕа төннүбүттэр, ол саҕана кини Капитоновка сэбиэтин бэрэстээтэлинэн үлэлиирэ.

Ини-бии Нифонтовтар тустарынан бэчээккэ

• Братья Нифонтовы // Тулагы-Киллэм нэһилиэгэ : Дьокуускай куорат уокуруга / хомуйан оҥордулар: М.П. Федорова уо.д.а. - Дь. : Бичик. 2016. - С. 171-172 : фот.