Егасов Елпидифор Михайлович

Егасов Елпидифор Михайлович (1882-22.02.1921) — саха сырдатааччыта, учуутал, 1907-09 сс. "Саха дойдута" (Якутский край) уонна "Саха олоҕо" (Якутская жизнь) социал-демокрааттыы хаһыаттар эрэдээктэрдэрэ, 1918 сыллаахтан Саха уобалаһын земскай быраабатын чилиэнэ, 1919 сыл атырдьах ыйыттан ВКП (б) чилиэнэ, Саха сирин губревкомун норуот үөрэҕириитин отделын сэбиэдиссэйэ. "Олунньутааҕы саагыбарга" буруйданан суута суох, Губревтройка 20.02.1921 күнүнээҕи уураҕынан 22.02.1921 күнүгэр ытыллыбыт.

Олоҕо

Боотур уус улууһугар (билигин Таатта) 3-с Дьохсоҕон нэһилиэгэр Күнээйи ууһугар 1882 сыллаахха төрөөбүт. Аҕата Егасов (Эгасов) Михаил Алексеев, Чалбах диэн сахалыы ааттааҕа 1895 сыллааҕы биэрэпискэ бэлиэтэммит, сүөһү иитээччи, сир хорутааччы (землепашец) дэммит. Ийэтэ Ульяна Иванова. Елпидифор ыалга соҕотох уол (улахан оҕо?), кини кэнниттэн аҕыс кыыс төрөөбүт курдук, үс кыыс улаатан оҕо-уруу тэниппит курдуктар.

Дьокуускайдааҕы реальнай учуулуссаны бүтэрбит. Баайаҕа, Нам, Өлүөхүмэ, Чурапчы оскуолаларыгар учууталлаабыт. Дьокуускайга түөрт кылаастаах оскуолаҕа преподавателлээбит.

П. Ойуунускай бэйэтин ахтыытыгар "Егасов учуутал куукунатыгар олорон үөрэммитим" диэбиттээх.

1921 сылаахха олунньу 20 күнүгэр Губчека быһаарыытынан хаайыллыбыт. Губревтройка 1921 с. олунньу 20 күнүнээҕи уурааҕынан ытан өлөрүүгэ ууруллубут, 22-скэ ытыллыбыт.

1989 сыллаахха атырдьах ыйын 9 күнүгэр Саха АССР Урдүкү суутун бөрөсүүдьүмүн уурааҕынан реабилитацияламмыт.

Дьиэ кэргэнэ

Бииргэ төрөөбүт балтылара Капитолина Михайловна (Тыараһаҕа Кангаласов Киргиэлэй кэргэнэ буолбут), Мотрена Михайловна (Чөркөөххө Лазарев Василий кэргэнэ буолбут) уонна Прасковья Михайловна (1933 с. 43 сааһыгар өлбүт) Егасовтар.

Кэргэнэ сүөһүнэн байбыт Нестор Слепцов кыыһа Мария Нестеровна Слепцова (Маайа).

Кыыһа Зинаида Елпидифоровна, учуутал идэлээҕэ, бэйэтэ оҕото суох, биир уолу ииттибит (Жерготов Егор Егорович), 77 сааһыгар өлбүт.

Сигэлэр

• Изабелла Жерготова. Аймахпыт учуутал Елпидифор Егасов сырдык кэриэһигэр, 20.04.2022