Дьокуускай уулуссалара
Дьокуускай уулуссалара — манна Дьокуускай проспектара, улууссалара. куоллаҕастара, набережнайдара, болуоссаттара, шосселара көстөр.
Каландаришвили уулуссата — урукку Соборнай уулусса, 1925 сыллаахха кулун тутар 2 күнүгэр Нестор Александрович Каландарашвили аатынан ааттаммыта. Бу уулусса куорат бастакы уулуссаларыттан биирдэстэрэ. XVII үйэҕэ Дьокуускай кириэппэһин тутуу кэнниттэн баар буолбута. Аата Свято-Троицкай собуор аатын сүкпүтэ. Өрөбөлүүссүйэ иннинэ сороҕор бэчээккэ Губернаторскай диэн ааттаыллара ыйыллар, тоҕо диэтэххэ күбүрүнээтэр дьиэтэ уулусса саҕаланыытгар турара. Ону таһынан куорат олохтоохтору бу уулуссаны Меликовскай диэн ааттыыллара биллэр, тоҕо диэтэххэ бу уулуссаҕа борокуруор, статскай советник, этнографияннан дьарыктаммыт Д. И. Меликов дьиэтэ турбут эбит. Бу Меликов Бүлүүгэ Н.Г. Чернышевскайы кэтээбитинэн биллэр, 1889 сыллаахха Монастыревка кыттыылаахтарын суукка көмүскээбит, онтон сылтаан сулууспатыттан ууратыллыбыт[1].
Ленин проспега — Дьокуускай сүрүн уулуссата, XVIII-XIX үйэ саҕаланыытыгар Иркутскай уулусса диэн ааттааҕа, Иркутскай трага салгыы барара. XIX үйэ саҕаланыытыттан Большая (Улахан) диэн ааттаммыта. Куорат соҕуруу өттүттэн саҕаланара уонна Семинарскай күөлгэ түмүктэнэрэ. 1918 сыллаахха Олунньутааҕы өрөбөлүүссүйэ аатынан "улица Февральской революции" диэн ааттаммыта. 1924 сыллаахха Өктөөп өрөбөлүүссүйэтин аатынан "улица Октябрьской революции" дэммитэ, онтон 1934 сыллаахха көннөрү "Октябрьская" диэн ааттанар буолбута. 1962 сыл бэс ыйын 18 күнүгэр Дьокуускай горсоветын уонна ССКП Дьокуускайдааҕы кэмитиэтин мунньахтарын быһаарыытынан Саха АССР 40 сылыгар уулуссаны В.И. Ленин аатынан проспект диэн ааттаабыттара[2].
Лермонтов уулуссата — Дьокуускай саамай уһун уулуссата, бэйиэт Михаил Лермонтов аатын сүгэр. XX үйэ саҕаланыытыгар ааттаммыта. Куорат киинигэр Дзержинскай уулуссатыттан саҕаланан баран (Федор Попов уулуссатын салгыытын курдук) Сайсарыга Гимеин түөлбэтигэр түмүктэнэр, салгыы Сэргэлээх шоссета саҕаланар.
Ломоносов уулуссата — Дьокуускай куоратын Дууматын быһаарыытынан 1915 сыллаахха "Ломоносовская улица" диэн баар буолбута, кэлин "М.В. Ломоносов аатынан уулусса" диэн ааттыыр буолбуттара. Автовокзал аттыгар билиҥҥи Октябрьскай уулуссаттан саҕаланан баран Петровскай уулуссатыгар түмүктэнэр, ол эрээри дьиэлэрэ салгыы соҕуруу диэки Каландаришвили уулуссатыгар диэри бааллар (кэлин этээстээх дьиэлэр тутулланнар уулусса бэйэтэ сарбыллан хаалбыт).