Габышева Виктория Валентиновна
Габышева Виктория Валентиновна (псевдоним Бэриэччик[1]) — дьон быраабын көмүскүүргэ идэтийбит суруналыыс, суруйааччы, РФ Суруналыыстарын сойууһун чилиэнэ (1996 сыллаахтан), РФ Суруйааччыларын сойууһун чилиэнэ (2008 сыллаахтан).
Амма сэлиэнньэтигэр учууталлар дьиэ кэргэннэригэр 1964 сыллаахха ыам ыйын 21 күнүгэр төрөөбүтэ. Өлүөхүмэ Үҥкүрүгэр орто оскуоланы бүтэрбитэ. Дьокуускайдааҕы педучилищены бүтэрэн уһуйаан иитээччитин идэтин ылбыта. Улан-Удэ куоракка «режиссура массовых праздников» диэн идэҕэ үөрэммитэ (ВСГИК).
Араас эйгэҕэ үлэлээбитэ, 1996 сыллаахтан ‒ Дьокуускай хаһыаттарыгар, ол иһигэр «Эхо Столицы» хаһыакка (1997-2008). Эдьиийэ суруйааччы Ариадна Борисова сүбэтинэн суруйар буолбута[2].
Хас да кинигэ ааптара:
- 2008 — Солнышко лесное. Викторианские истории (сборник)
- 2014 — Вера, Надежда… Любовь (сборник)
- 2015 сыллаахха «Карина. 12 дней в тайге» диэн кинигэтэ тахсыбыта.
«Батас» диэн хоруупсуйаны утары үлэлиир түмэт-тэрилтэни (РОО) тэрийбитэ, албыннаппыт дьоҥҥо хас да кыбартыыраны, дьиэни, сир учаастагын төннөрөргө сүрүн оруолу оонньообут өҥөлөөх.
СӨ «Көмүс бөрүө» бириэмийэтин икки төгүллээх лауреата, «Единая пресса» диэн Уһук Илин суруналыыстарын күрэһин гран-приитын туппута, «Преодоление» диэн Арассыыйа суруналыыстарын сойууһун күрэһин дипломаана, Байкааллааҕы Информационнай форум «Чужих детей не бывает» диэн күрэһин дипломаана, ОНФ «Правда и справедливость» диэн күрэһин дипломаана, СЖР «Большие победы маленьких людей» икки төгүллээх дипломаана. Сахаров бириэмиэйтин номинаана. Суруналыыстыкаҕа өҥөлөрүн иһин бэлиэнэн, элбэх биэдэмистибэ грамоталарынан бэлиэтэммитэ.