Виллер-Котре ордонанса
Виллер-Котре ордонанса (фр. Ordonnance de Villers-Cotterêts; 1539 сыл атырдьах ыйын 10 күнүгэр илии баттаммыт) — Франция хоруола Франциск I Виллер-Котре диэн куоракка таһаарбыт ыйааҕа. Франция сомоҕо дойду буоларыгар улахан суолталаах докумуон (ордонанс туруору тылбааһа — бирикээс). Тылга сыһыаннаах өттө билиҥҥээҥҥэ диэри Францияҕа туттуллар, онон билигин туттулла сылдьар сокуоннартан саамай кырдьаҕастара.
Устуоруйата
[уларыт | биики-тиэкиһи уларытыы]Бу ыйааҕы сүнньүнэн канцлер Гийом Пойе бэлэмнээбитэ, 192 ыстатыйалаах этэ уонна бырабыыталыстыба, суут уонна сыаркап боппуруостарын таарыйара. Хоруол хаһан илии баттаабыт күнэ чопчу биллибэт, атырдьах ыйын 10 уонна 15 күннэрин ыккардыгар. Ол эрээри үксүн атырдьах ыйын 10 күнэ ааттанар.
Виллер-Котре куорат Парижтан 80 км хотугулуу-арҕаа турар. Франциск I маннааҕы замогы бэйэтин көрсүүтүн олордоору атыыласпыта.
Суолтата
[уларыт | биики-тиэкиһи уларытыы]Сүрүн суолтата: хоруол былааһын суут өттүнэн күүһүрдүбүтэ, абсолютнай монархияҕа хардыы буолбута. Ону таһынан бу докумуон боронсуус тылын сокуоннарга, суукка, нотариат кумааҕыларыгар туттар туһунан ыстатыйалара боронсуустары биир тылынан саҥарар буолалларыгар, омук сомоҕо наассыйа буоларыгар сүдү суолтаны ылбыта.