Васильев Карл Иннокентьевич

Васильев Карл Иннокентьевич — экономическай наука кандидата, 1954 сыл­лаах­ха Ньурба оройуонугар 1 Бордоҥ нэһилиэгин Маалыкай сэлиэнньэтигэр сулуус­палаах кэргэнигэр төрөөбүтэ.

Маалыкай орто оскуолатын, онтон Иркутс­кай­даа­ҕы тыа хайаайыстыбатын институтун 1976 сыллаахха бүтэрэн, экономист-плановик идэтин ылбыта. Кини Тыа хаһаайыстыбатын министерствотыгар контролер экономииһынан үлэтин саҕалаабыта. Ити кэмтэн саҕалаан сүүрбэттэн тахса сыл устатыгар хаһаайыстыбаннай, производственнай салааларга араас дуоһунаска улэлээн улахан уопуттаах салайар үлэһит кэккэтигэр киирдэ.

Кэлиҥҥи уонтан тахса сылга «Саха Республикатын күндү металларга уонна таастарга комитетын» — государственнай унитарнай предприятиетын генеральнай директорынан үлэлии сылдьар. Бу кэрдиис кэмҥэ республика үлэһиттэрэ саҥа экономическай сыһыаннаһыыларга — рынокка киирии эппиэттээх кэмигэр, үбү-харчыны түмэр, ол үбү көдъүүстээхтик туһаныыны хааччыйар аналлаах тэрилтэ сүһүөҕэр турда, үрдүк квалификалиялаах кадрдарынан хааччылынна. Республика экономиката сайдыытыгар биир улахан быһаарар суолталаах олох саҥа структураны тэрийиигэ К. И. Васильев өҥөтө улахан.

Кини саҕалааһынынан уонна быһаччы кыттыытынан Комитет иһинэн республика валютнай фондата тэриллибитэ, Саха сирин күндү баайа: көмүс, алмаас, бриллиант оҥоһуктар хараллар хранилищелара үлэлиир буолта.

Кэккэ сылларга К. И. Васильев «Де Бирс» уонна «АЛРОСА» акционернай компания холбоһуктаах Кэтээн көрөр сэбиэтин чилиэнинэн үлэлээтэ уонна Россия, Саха сирин алмаас-бриллиант комплексын сайдыытыгар бэйэтин сэмэй кылаатын киллэрдэ. Саха сирин интэриэһин көмүскээһиҥҥэ туруулаһан үлэлэстэ.

К. И. Васильев 2002 сыл ахсынньы ый 29 күнүгэр Табаҕатааҕы быыбардыыр уокуруктан Ил Түмэн депутатынан талыллан үлэлэбитэ. Кини быыбар иннинээҕи программатыгар «Эйигинниин бииргэ Туймаада уонна Эркээни хочолорун Саха Республикатын «визитнэй карточкатынан» 5 сыл иһинэн оноруохпут» диэн туран, элбэх тутууну ыыттарарга эрэннэрбитэ, онто туоларын иһин сыраланан үлэлээбитэ.

К. И. Васильев үлэтэ «Норуот хайаайыстыбатын үтүөлээх үлэһитэ» бочуоттаах аатынан бэлиэтэммитэ.