Васильева Мария Егоровна (1904-1999)

Васильева Мария Егоровна (03.03.1904-1999) — үлэ удаарынньыга, Тулаҕы-Киллэм нэһилиэгин Ытык киһитэ.

1904 с. кулун тутар 3 күнүгэр Нам улууһун Үөдэйигэр төрөөбүт. Дьоно Ядреевтэр сэниэ ыаллар эбит. 1922 с. кэргэн тахсан Тулаҕыга көспүт. 1927 с. эрин кытта "Кыһыл балта" диэн артыалга киирбиттэр. 1930-с сс. "Сталин" холкуоска ыанньыксыттаабыт. 1938 с. ВКП (б) чилиэнэ буолбут. Эрин 1939 с. репрессиялаабыттар, өлөрбүттэр. Сэрии иннинэ үчүгэй көрдөрүүлээх үлэтин иһин ВДНХ-ҕа барар чиэскэ тиксибит эрээри, кыайан барбатах. Сэрии саҕаламмытын кэннэ кылгас кууруска үөрэнэн баран 1941-43 сс. тырахтарыыстаабыт. 1943 с. иккистээн ойох тахсыбыт, үс оҕону төрөппүт. "Дьокуускай" сопхуоска 1944 сылтан 1973 сылга диэри ыанньыксыттаабыт.

Элбэх үүтү ыабытын иһин 1957 с. "Бочуот знага" уордьанынан, 1966 с. Ленин уордьанынан, 1967 с. "Килбиэннээх үлэтин иһин" мэтээлинэн. 1977 с. "Сэбиэскэй Сойуус маршала Жуков" мэтээлинэн наҕараадаламмыт. Көхтөөх уопсастыбанньык, үчүгэй агитатор эбит.

1967 с. Тулаҕы-Киллэм нэһилиэгин Ытык олохтооҕоун аата иҥэриллибит.

1999 с. күһүн өлбүт.

Аатын үйэтитии

Сыырдаах сэлиэнньэтигэр баар уулуссаҕа 2015 с. аата иҥэриллибитэ..