Бэрт Маарыйа

Бикипиэдьийэ диэн сиртэн ылыллыбыт

Бэрт Маарыйа — мындырынан, сиэрдээх майгытынан аар-саарга аатырбыт Тааттаттан төрүттээх XIX үйэҕэ олоро сылдьыбыт саха дьахтара. Манчаары Баһылай кини тылын-өһүн истээри анаан-минээн кэлэ сылдьыбытын туһунан номох баар.

Мэҥэ Тараҕай нэһилиэгэр Куталаах диэн сиргэ олоро сылдьыбыт Владимир Слепцов, сахалыы аата Чыкыйаас, диэн киһи Таатта улууһуттан баай ыал кыыһын ойох ылбыт. Оҕолонон-урууланан бэркэ олорон иһэн дьахтар ыалдьан өлбүт. Ол өлөрүгэр, оҕолорбун сүтүөр ийэ атаҕастыа диэн, балтыбын Маарыйаны кэргэн ылаар диэн кэриэһин эппит. Ону толорон Чыкыйаас Тааттаттан Маарыйаны сүгүннэрэн аҕалбыт. Түөрт оҕоломмуттар. Чыкыйаас өлбүтүн кэннэ эдэр дьахтар 8 оҕону бэйэтэ улаатыннарбыт. Сатабылынан баайын өссө хаҥаппыт[1].

Утумнара[уларыт | биики-тиэкиһи уларытыы]

Бэйэтэ Чыкыйаастан 4 уоллааҕа. Биир уола Суһуохтаах Мааркап (Марк) Тараҕай нэһилиэгэр 24 сыл кинээстээбит, икки ыҥырыкка Мэҥэ улууһугар кулубалаабыт, 1893 сыллаахха 71 сааһыгар өлбүт. Кини икки уола Уйбаан уонна Сүөдэр Мааркабыстар Мэҥэ улууһун сис баайдара буолан Бүтэйдээххэ аатыран-сураҕыран олорбуттар.

  • Күннүк Уурастыырап — Федор Маркович Слепцов диэн Бэрт Маарыйа сиэнин сиэнэ.
  • Иван Арбита — Бэрт Маарыйа аччыгый уола Бөҕө Уйбаан Дьөгүөр диэн уолун уола.
  • Поэт Леонид Попов — Иван Маркович кыыһын Мария Ивановнаны Сунтаартан Андрей Николаевич Попов сүгүннэрэн барбыт.

Быһаарыылар[уларыт | биики-тиэкиһи уларытыы]

  1. Протопопова Н. И. Бэрт Маарыйа удьуордара. Айыы Далбар Хотуна. —Дь.: «Бичик», 1999. — 224 с., 6—17 с.