Бастааччы

Бастааччы (форвард, ааҥл. forward) эбэтэр тэбээччи (страйкер, ааҥл. striker) диэн инники позицияҕа сылдьар футболист. Кини сүрүн сыала утарсааччы хамаандатын хахпатыгар голлааһын буолар. Аныгы футбол схемаларыгар 1-3 бастааччы баар буолуон сөп.

Көрүҥнэрэ:

Киин бастааччы (центр-форвард, ааҥл. centre-forward) диэн киин позициялаах сүрүн гол киллэрэр бастааччы
Иккис тэбээччи (ааҥл. second striker) эбэтэр тардыллыбыт бастааччы (нууч. оттянутый нападающий) диэн киин бастааччы кэннинэн позициялаах бастааччы. Кини атаакаҕа кыттарын таһынан хонуу ортотугар мээчиги былдьаһан утарсааччы атаакаларын тохтоторго көмөлөһөр. Ардыгар маннык футболистары плеймейкер (ааҥл. playmaker) диэн ааттыыллар. Плеймейкер оруола үксүгэр атаакалыыр ортоһуту кытта булкуһар
Вингер (ааҥл. winger) диэн хонуу кытыытынан (фланганан) атаакалыыр бастааччы. Хонуу ханнык кытыытыгар оонньууруттан вингер уҥа-хаҥас буолар. Кэлин сылларга вингердар бастааччы уонна ортоһут позицияларын холбуур универсал оонньооччу буоллулар
Инсайд (ааҥл. inside) диэн эрдэтээҥҥи 2-3-5 (пирамида) уонна 3-2-5 (дубль-вэ) схемаларга киин бастааччы уонна вингер ыккардыларыгар позициялаах бастааччы