Винокуров И.Е. аатынан Намнааҕы педагогика кэллиэһэ

Намнааҕы Винокуров И.Е. аатынан технология уонна дизайн педагогика колледжа

Винокуров И.Е. аатынан Намнааҕы педагогика кэллиэһэ (урукку аата Намнааҕы педагогика училищета) - үлэ уонна уруһуй учууталларын бэлэмниир орто үөрэх тэрилтэтэ.

1963 сыллаахха Нам улууһун Нам сэлиэнньэтигэр Намнааҕы оскуола-интэринээт оннугар аһыллыбыта. Ол туһунан РСФСР үөрэҕин миниистирин бирикээһэ 1963 сыл атырдьах ыйын 19 күнүгэр тахсыбыта. Бастаан учуулусса начаалынай кылаас учууталларын 7 кылааһы бүтэрбит оҕолортон бэлэмниир этэ, ону тэҥэ учуутал идэлээх дьону 10 ыйдаах кууруска ылан матымаатыка учууталларын бэлэмниирэ. Бастакы сыл 60 оҕо Намҥа бэйэтигэр үөрэнэ киирбит, эбии 30 оҕо Бүлүү учуулуссатыгар эксээмэн туттаран кэлбиттэр. Физика-матымаатыка бастакы кууруһун 1964 сыллаахха 22 киһи бүтэрбит. Алын кылаастар учууталларын бэлэмниир салаа1970 сыллаахха сабыллыбыта.

2002 сыл муус устар 26 күнүгэр үөрэх кыһата СӨ бэрэсидьиэнин ыйааҕынан Нам улууһуттан төрүттээх саха уһулучулаах судаарыстыбаннай диэйэтэлэ Винокуров Илья Егорович аатын сүкпүтэ.

Училище дириэктэрдэрэ

• 1963 - 1965 Шапошников Владимир Петрович;
• 1965 - 1966 Сивцев Михаил Алексеевич;
• 1966 - 1969 Винокуров Дмитрий Иванович;
• 1969 - 1973 Гаврильев Иван Семенович;
• 1973 - 1989 Москвитин Иннокентий Романович;
• 1989 - 2003 - Иванов Василий Петрович.
• 2003 - 2005 - Местников Петр Петрович
• 2005 - билиҥҥэ диэри - Ядреева Екатерина Владимировна.

Араас сылларга училищеҕа үлэлээбиттэрэ үтүөлээх учуутал Гаврильева Р.Н., үөрэҕирии туйгуннара Азарова В.П., Шапошникова В.П., худуоһунньуктар холбоһуктарын чилиэнэ Крылов К.К. Ону таһынан Местникова К.Ф., Бережнов Н.И., Крылова В.П., Яковлева К.П. уонна да атыттар.

Билигин Намнааҕы Винокуров И.Е. ааттынан технология уонна дизайн педагогика колледжа диэн ааттаах

Өссө маны көр

• Намнааҕы технология уонна дизайн колледжын саайта

Ылыллыбыт сирэ

• Энциклопедия Якутии. Якутск, 2000.