Адамов Гавриил Николаевич

Бикипиэдьийэ диэн сиртэн ылыллыбыт

Адамов Гавриил Николаевич — БАМ тутааччыта, «Саха хомсомуола» (нууч. Якутский комсомолец) этэрээт хамыһаара, Норуоттар доҕордоһууларын уордьанын кавалера[1].

1975 сыллаахха Дьокуускайга СМУ-1 тэрилтэҕэ Социалистыы үлэ дьоруойа Михаил Сергеев биригээдэтигэр мас уһуунан (столяр-плотник) үлэлии сырыттаҕына тимир суолу турарга Бүтүн Сойуустааҕы ударнай тутуу биллэрбиттэр. Дьокуускайтан эмиэ хомсомуол этэрээтин хомуйбуттар, онно хапсан 16 киһи ахсааныгар киирэн СМУ-ттан 5 эдэр киһи барбыт. Обкомҥа ыҥыран хомсомуол путевката туттарбыттар, ыам ыйын 15 күнүгэр Политпрос дьиэтигэр үөрүүлээх быһыыга-майгыга атаарыы буолбут, ыам ыйын 21 күнүгэр Амыр уобалаһыгар аттамыттар.

Бастаан Беленькая диэн ыстаансыйа аттыгар балааккаҕа сытан үлэлээбиттэр: тутуу массыыната сылдьарыгар аналлаах суолга үрэхтэри туоруур күргэлэри туппуттар.

Наһаа доҕордуу, көхтөөх этибит. Элбэх ыалдьыт кэлэрэ — суруналыыстар, суруйааччылар, тэлэбиидэнньэ. Мунчаарар соло суоҕа.

Күһүн алтынныьга Тыындаҕа — «Москуба хомсомуола» этэрээт кэлэригэр бэлэмнэниигэ ыыппытар. 300 киһи олорор сирдэрин, вагончиктарын бэлэмнээбиттэр. Онтон сэтинньигэ кураанах сиргэ Могот диэн бөһүөлэк тутуутугар ыыппыттар. Щиттэн оҥоһуллубут дьиэлэр фундаменнарын туппуттар, уулусса буолуохтаах сирдэри маһын кэрдибиттэр, түүнүн тутуу матырыйаалын массыынаттан сүөкүүллэр эбит. Онтон олунньуга Нагорнай бөһүөлэги тутууга ыыппыттар. Бу кэннэ тимир суол просекатын кэрдиигэ сылдьыбыт. Онтон Тыындаҕа суол таҥааччы (нууч. монтер пути, тимир суолу таҥар оробуочай) үөрэҕэр ыыппыттар. Онон 1976 сыл атырдьах ыйыттан быһаччы тимир суол тутуутугар сылдьыбыт.

Быһаарыылар[уларыт | куодун уларытыы]