Тылбаасчыттар Аан дойдутааҕы федерациялара

Бикипиэдьийэ диэн сиртэн ылыллыбыт

Тылбаасчыттар Аан дойдутааҕы федерациялара, ТАФ – (Federation internationale des traducteurs - FIT) 1953 сыллаахха Парижка олохтоммут тылбаасчыт идэлээхтэр холбоһуктара, кэммиэрчэскэйэ суох, бэлиитикэҕэ орооспот тэрилтэ. Пьер-Франсуа Кайе диэн киһи тэрийбитэ. Федерацияҕа 80 000 тахса тылбаасчыты түмэр 55 дойдуттан 100 тахса идэлээх холбоһуктар киирэллэр. ЮНЕСКО-ны кытта бииргэ үлэлиир.

Сыаллара:[уларыт]

Араас дойдулар тылбаасчыттарын тэрилтэлэрин түмүү, ол тэрилтэлэргэ туһалаах информацияны хомуйуу уонна тарҕатыы, тылбаасчыттар бырааптарын көмүскээһин, тылбааһы идэ уонна ускуустуба көрүҥүн быһыытынан пропагандалааһын, уопсастыбаҕа тылбаасчыт стаатуһун тупсарыы.

ТАФ BABEL диэн билим сурунаалын уонна Translatio диэн федерация олоҕун кэпсиир бюллетень таһаарар.

Салалтата[уларыт]

ТАФ үрдүкү уоргана Аан дойдутааҕы кэҥгириэс буолар. Кэҥгириэс талбыт Бюрота тэрилтэ күннээҕи кыһалҕатын быһаарар үлэни салайар. ТАФ штаб-квартирата Парижка баар.

ТАФ II кэҥгириэһигэр (Рим, 1956 сыл) тылбаасчыт ааптар быһыытынан бырааба аан бастаан ырытыллыбыта. IV кэҥгириэскэ (Дубровник, 1963 сыл) тылбаасчыттары бэлэмнээһин туһунан ыйыы-кэрдии уонна тылбаасчыттары аттестациялааһын киритиэрийдэрэ оҥоһуллубуттара, Тылбаасчыт быраабын уонна эбээһинэһин туһунан Хартия ылыныллыбыта.

XIII кэнгириэскэ (Брайтон, 1993) ТАФ Арассыыйа тылбаасчыттарын сойууһун толору бырааптаах чилиэн быһыытынан ылбыта.

XV кэҥгириэс 1999 сыл атырдьах ыйын саҥатыгар Монсе куоракка (Бельгия) буолбута. Сиэксийэлэрэ: уус-уран тылбаас; билим, техническэй уонна урбаан тылбааһа; саҥарыы тылбааһа; тылбаасчыт идэтин статуһа уонна идэ кэнэҕэскитэ; тылбаас туһунан үөрэх (переводоведение).

XVI кэҥгириэс Ванкувер куоракка үлэлээбитэ (Канаада). 2002-2005 сылларга үлэлиэхтээх ТАФ Сэбиэтин саҥа састааба уонна бэрэсидьиэнэ Бетти Коэн (Betty Cohen, Канаада) талыллыбыттара.

XVII кэҥгириэс 2005 сыллаахха атырдьах ыйын 2-10 күннэригэр Тампере куоракка (Финляндия) буолбута.

Онтон Кэҥгириэстэр Шанхаайга (2008) Сан-Францискоҕа (2011) буолбуттара. Аныгыскы ХХ кэҥгириэс Берлииҥҥэ 2014 сыллаахха атырдьах ыйын 4 - 6 күннэригэр буолуоҕа[1].

Тас сигэлэр[уларыт]

Быһаарыылар[уларыт]